Theret me thikë 19 vjeçari, ndodhet në rrezik për jetën

Konfliktet mes të rinjve jo rrallëherë eskalojnë në përleshje fizike, për çka nevojitet edhe ndërhyrja e Policisë. Motivet shpesh dalin të jenë banale dhe lidhen me probleme për të cilat ata nuk arrijnë të merren vesh dhe për pasojë futen në sherr. Një rast i tillë ka ndodhur mbrëmë në Kushnin të Prizrenit, ku mbeti i therur me thikë një person, raporton Gazeta Sinjali.

Këtë herë në rast janë përfshirë dy persona, që dyshohet se u kapën për motive akoma të panjohura. Përleshja eskaloi deri në përdorimin e thikës, me ç’rast një 19-vjeçar mbeti i lënduar rëndë.

Burimet nga Emergjenca kanë bërë me dije se viktima është dërguar në gjendje kritike në spital dhe sipas informacioneve të para ndodhet në rrezik për jetën.

I dyshuari është shoqëruar në stacion policor për intervistim, ku ka dhënë deklaratën e tij në lidhje me rastin. Pas përfundimit të procedurave policore, Prokurori i Shtetit ka urdhëruar që ndaj tij të caktohet masa e ndalimit për 24 orë.

Prokurori i Shtetit ka urdhëruar që ndaj të miturit të iniciohet rasti për veprën penale “Lëndim i rëndë trupor”.