Ademi merr dhuratë fanellën e Granit Xhakës me nënshkrimin e tij

Kryetari i Federatës së Futbollit të Kosovës, Agim Ademi, ka pritur në takim Ragip Xhakën, babanë e futbollistit të Arsenalit Granit Xhaka.

Ademi me këtë rast pranoi fanellën e Granitit me nënshkrimin e tij, transmeton Klankosova.tv.

“Sot në selinë e Federatës së Futbollit të Kosovës prita një mysafir të veçantë – Ragip Xhakën, babanë e një prej futbollistëve më të shquar të Arsenalit dhe të Kombëtares së Zvicrës, Granit Xhaka”.

“Me kënaqësi të madhe e pranova fanellën e Granitit me nënshkrimin e tij, të cilën do ta ruaj si një dhuratë të çmuar në koleksionin tim të futbollit”.

“Ragipi më përgëzoi për punën e deritanishme në krye të FFK-së dhe shprehu shpresën që Kosova do të arrijë kualifikimin në Kampionatin Evropian së bashku me Zvicrën”.

“Me këtë rast, Granitit i dërgova urimet më të mira, duke shprehur shpresën që sivjet do të arrijë ta fitojë titullin e kampionit me Arsenalin në Ligën Premiere dhe do të vijojë të shkëlqejë në fushën e futbollit edhe për shumë vjet”.