Këto janë shtetet që votuan kundër aplikimit të Kosovës në Këshill të Evropës
Aplikimi i Kosovës për anëtarësim në Këshill të Evropës ka kaluar të hënën fazën e parë. Komiteti i Ministrave ka vendosur të pranohet aplikimi i Kosovës dhe e ka kaluar këtë aplikim te Asambleja Parlamentare, shkruan Gazeta Sinjali.
Por jo të gjitha shtetet votuan pro këtij avancimi të Kosovës për rrugën drejtë Këshillit të Evropës.
Ambasadori i Kosovës në Bruksel, Agron Bajrami ka treguar se Azerbeidzjan, Qipro, Gjeorgjia, Hungaria, Rumania, Serbia dhe Spanja votuan kundër Kosovës. Pra prej shteteve që e kanë njohur Kosovën kundër ishte Hungaria që drejtohet nga Viktor Orban.
Në anën tjetër kanë abstenuar Bosnja, Greqia, Moldavia, Sllovakia dhe Ukraina.
Ndërkaq nuk ka votuar fare Armenia.
Zëvendësministri i Punëve të Jashtme, Kreshnik Ahmeti e dha lajmin në Twitter, duke e quajtur këtë “moment historik”.
“Komiteti i Ministrave i Këshillit të Europës ka votuar pro procedimit të aplikimit të Kosovës në Asamblenë Parlamentare. Ky është një moment historik shumëpalësh i rëndësishëm i arritur pas lobimit intensiv”, shkroi Ahmeti.
“Ne presim të bashkëpunojmë me Asamblenë Parlamentare dhe raportuesit e saj”, shtoi ai.
Me këtë hap, Kosova përmbylli fazën e parë të anëtarësimit në Këshillin e Europës.
