Nxënësi kërcënon me jetë mësimdhënësin

Sjelljet e nxënësve në shkolla fillore e të mesme, jo gjithmonë janë konfrom rregullave të vendosura nga institucionet arsimore.

Shpeshherë ata kanë sjellje të pahijshme me gjuhë vulgare e me raste edhe kërcënuese ndaj mësimdhënësve e pjesës tjetër të stafit, raporton Gazeta Sinjali.

Me një situatë të tillë është përballur një mësimdhënës në qytetin e Pejës, i cili së fundi ka denoncuar në Polici një nxënës të shkollës fillore ‘Ramiz Sadiku’.

Burimet e Gazetës Sinjali brenda Prokurorisë kanë bërë me dije se e gjithë ngjarja dyshohet të ketë ndodhur brenda oborrit të Institucionit të Arsimit dhe Aftësimit Profesional ‘Rifat Gjota’  në rrugën ‘Esat Mekuli’.

44-vjeçari është detyruar që rastin ta denoncojë në Polici dhe si rrjedhojë, i mituri është shoqëruar në stacion policor, ku është intervistuar nga hetuesit policorë në praninë e prindit të tij dhe avokatit mbrojtës.

Pas përfundimit të procedurave policore, Prokurori i Shtetit ka urdhëruar që ndaj të miturit të nisin hetimet për veprën penale ‘Kanosje’.