Humolli: Kurti më futi në konflikt me shumë bashkëluftëtarë
Deputeti Fatmir Humolli ka thënë se VV ka acaruar shoqërinë dhe ka nxitur konflikte të brendshme të panevojshme.
Humolli në T7 tha se çështjet, sikur ajo e veteranëve dhe punëtorëve të arsimit, kanë mundur të zgjidhen shumë lehtë dhe pa arrogancë pasi që këto grupe kanë qenë për ardhjen në pushtet te VV-së me shpresën për gjetje të zgjidhjeve të problemeve të tyre.
“Arroganca dhe vendosmëria, nuk kanë të përbashkët kurrgjë. Ti mundesh me kanë i vendostë në qasjen tande, por s’ke nevojë me kanë arrogant.
Qeveria është sjellë me arrogancë në raport me mekanizmat që e ndërtojnë shoqërinë tonë. Është sjellë me arrogancë me veteranë të luftës, kur VV-ja ka më së shumti veteranë deputetë.
Edhe na ka injoru neve, na ka shti në konflikt neve me bashkëluftëtarë tonë të cilët na e kanë dhanë besimin neve. Për shembull mu më ka shti në konflikt me shumë bashkëluftëtarë dhe në fund Albinit, kur kena shku në balotazh në Podujevë, i kom thanë “Albin, ministri i Financave që kërkoi prej Republikës së Shqipërisë veteranë me pru një dëshmi a punojnë a s’punojnë në kohë fushate kur ishin zgjedhjet lokale, ai i ka ba një shërbim kundërshtarëve tonë.
Deri dje mu dashke nji shok me diskutu, ai i bindke 10 bashkëluftëtarë t’mi me porosi që ia çojsha unë.
Kurse sot po më duhet me secilin me bashkëbisedu, edhe po është pikëpyetje a po muj me i bindë a jo””, ka thënë ai.
