Bajqinovci: Deputetëve u duhet nga një asistent, ka shumë punë

Mefail Bajqinovci, deputet i Lëvizjes Vetëvendosje, ka komentuar rregulloren e miratuar në Kuvend që ua lejon deputetëve të punësojnë nga një këshilltar politik.

Bajqinovci e konsideron të drejtë që çdo deputet ta ketë nga një këshilltar për t’u ndihmuar, pasi thotë se ka shumë punë që duhet kryer.

“I vyn, asistenti ka shumë punë. Deputeti e ka pagën 1600 euro, duhet të ketë asistent sepse ka shumë punë”, tha ai në T7.

Tutje, ai është ankuar edhe për kushtet që ofron Kuvendi i Kosovës, pasi thotë se s’ka salla për të mbajtur takime.

“Tash është marrë vendim dhe është kryer kjo punë. Nëse flasim për mungesën e deputetëve mund të flasim, por kjo është temë tjetër. Po e tregoj të vërtetën. Takimet e mia si deputet i kryej nëpër komuna dhe kafe. Nuk ka vend në Kuvend ku t’i presësh palët. Ka palë që nuk dëshiron të shihet nëpër kafe”, shtoi ai.