E tmerrshme: Rrahje brutale mes disa personave, 14-vjeçares ia thyejnë kafkën

Një ngjarje e rëndë ka ndodhur mbrëmjen e së shtunës në fshatin Radevë e Graçanicës, ku disa persona dyshohet se janë përfshirë në një përleshje brutale dhe si pasojë një vajzë e mitur ka marrë lëndime serioze, raporton Gazeta Sinjali.

Burimet e Gazetës Sinjali brenda Emergjencës kanë bërë me dije se 14-vjeçarja është dërguar atje me lëndime të rënda dhe pas ekzaminimeve mjekësore është konstatuara se ka pësuar frakturë në kafkë si pasojë e goditjeve.

Pas intervenimit të mjekëve, gjendja e saj është stabilizuar dhe e mitura është shtrirë në spital për trajtimet e mëtejshme mjekësore nën përkujdesjen e stafit shëndetësor.

Ndërkohë lidhur me rastin është njoftuar edhe Policia, të cilët kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.

Lëndime si pasojë e përleshjes ka marrë dhe një 17-vjeçare e cila ka pësuar frakturë në nofull.

Dy ditë pasi ka ndodhur rasti, viktimat kanë dhënë dëshmitë e tyre para organeve të hetuesisë.

Me urdhër të prokurorit, rasti është iniciuar ‘Lëndim i rëndë trupor’.