63 vjeçari sulmohet nga gruaja

Rastet e dhunës në familje në vendin tonë, çdo ditë e më shumë janë në rritje.

Në shumicën e rasteve, ato raportohen nga gratë të cilat përjetojnë dhunë psikike e fizike kryesisht nga bashkëshortët e tyre.

Por ka raste kur edhe burrat kërkojnë ndihmë në Polici, pasi sulmohen nga partneret e tyre.

Kështu ka ndodhur së fundmi në Shkabaj të Prishtinës dhe viktimë këtë herë është një burrë, raporton Gazeta Sinjali.

Burimet e Gazetës Sinjali brenda Prokurorisë kanë bërë me dije se rasti është raportuar nga një 63-vjeçar, i cili e ka denoncuar në Polici gruan me të cilën po bashkëjeton që disa muaj.

Sinjali mëson e gjithë ngjarja ka ndodhur në shtëpinë e viktimës, ku çifti kishte pasur fillimisht një mosmarrëveshje mes vete, e që eskaloi nga dhuna psikike në dhunë fizike. Për pasojë, e dyshuara e ka sulmuar partnerin e saj 63-vjeçar, të cilit i ka shkaktuar lëndime trupore.

Njësitet policore kanë intervenuar në vendin e ngjarjes, ku kanë arritur ta kapin të dyshuarën, e cila më pas është shoqëruar në stacion policor për intervistim.

Me vendim të Prokurorit të Shtetit, rasti ndaj saj është cilësuar “Dhunë në familje”.,