Hajnat vjedhin 20 mijë euro në një fabrikë

Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, biznese e institucione financiare që po shkaktojnë humbje e pasiguri, raporton Gazeta Sinjali.

Një vjedhje e rëndë ka ndodhur ka ndodhur mbrëmë pas mesnatës në fabrikën e këpucëve ‘Geris’ në magjistralen Prishtinë – Ferizaj.

Burimet e Gazetës Sinjali brenda Prokurorisë kanë bërë me dije se bëhet fjalë për vjedhjen e kasafortës së fabrikës, brenda së cilës ndodheshin 20 mijë euro para të gatshme dhe stoli ari në vlerë të rreth 10 mijë eurove.

Këtë e ka konfirmuar edhe pronari i fabrikës, Nysret Gashi, i cili tha për Sinjalin se hajnat kanë depërtuar me forcë brenda fabrikës, duke thyer një xham.

“Rreth orës 2, 2 e diçka kanë thy nji xham edhe kanë hi e kanë marrë arkën e firmës. Policia janë t’u u marrë, i kanë marrë pamjet edhe janë t’u u marrë me qatë proces. Janë 20 mijë euro shuma edhe dikun 10 mijë euro pjesë e stolive. Kompania ka sigurim fizik nga nji kompani e sigurimeve, jo në përgjegjësinë tonë”, tha Gashi.

Ndërkohë Sinjali mëson se njësitë policore kanë dalë në vendin e ngjarjes, ku kanë kryer të gjitha ekzaminimet e nevojshme që ndihmojnë në zbardhjen e rrethanave të rastit,

Sipas burimeve, Policia ka pranuar informacione se në një motel në Ferizaj, katër persona të maskuar janë parë e dëgjuar duke hapur diçka me forcë, e që kishte dyshime se mund të bëhet fjalë për personat e njëjtë që dyshohen për vjedhjen e rëndë.

Njësitë policore kanë dalë në vendngjarje, ku kanë gjetur një pjesë të kasafortës dhe e njëjta është verifikuar se i përket pikërisht sefit të kompanisë ‘Geris’.

Me urdhër të prokurorit, rasti është cilësuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.