Në Podujevë do të ndërtohet qendra për të moshuar

Sot gjatë ditës kryetari i komunës, Shpejtim Bulliqi ka zhvilluar takim me qytetarë përmes të cilit ka prezantuar raportin e punës së gjashtë mujorit të parë të vitit 2023. Kryetari Bulliqi ishte i shoqëruar nga nënkryetarja e Komunës, Marigona Lahu dhe drejtorë komunal.

Kryetari i Komunës, Shpejtim Bulliqi prezantimin e filloi me drejtorinë e Administratës duke vazhduar më tej më të gjitha drejtoritë e tjera komunale ku përmendi investimet kryesore në secilën drejtori veç e veç dhe drejtimet në të cilat janë zhvilluar punime dhe po vazhdojnë të zhvillohen.

Sa i përket drejtorisë për Buxhet dhe Financa, Kryetari Bulliqi vuri në theks të veçantë rritjen e vlerës së buxhetit Komunal, ku në vitin 2024 planifikohet të jetë 31,423,020.00 euro ndërsa deri në vitin 2026 planifikohet të arrijë vlerën 34,664,197.00 euro.

Në kuadër të drejtorisë së arsimit foli për ndërtimin e shkollës ekonomike “Isa Boletini” në qytet si projektin më madhor të kësaj drejtorie, dhe projekte të tjera si furnizimin e të gjitha shkollave me pajisje kompjuterike, furnizimi me kabinete muzikore, furnizimi me tabela dixhitale, furnizimi me inventar në çerdhe dhe instalimi i kamerave nëpër shkolla, si projekte të realizuara gjatë këtij gjashtë mujori.

Ndërsa në drejtorinë e Shëndetësisë theks të veçant i vuri punimet që po zhvillohen në ndërtimin e urgjencës së qytetit, ndërsa përmendi edhe marrëveshjen që këto ditë do të nënshkruhet për ndërtimin e qendrës rezidenciale për të moshuar në bashkëpunim me shoqatën “Jetimat e Ballkanit”.

Ndër të tjera kryetari Bulliqi pranoi edhe kritikat, sygjerimet dhe kërkesat e qytetarëve të cilët ishin të pranishëm në këtë takim, dhe i falenderoi qytetarët për pjesmarrje duke iu premtuar që do të vazhdoj me punë në realizimine kërkesave të cilat lehtësojnë jetesën e tyre.

30.06.2023, Podujevë
Zyra për Marrëdhënie me Publikun dhe Informim