Miqtë rrahen e bëhen për spital, njëri në gjendje të rëndë
Përleshjet mes miqve e familjarëve në vendin tonë nuk janë të rralla. Për motive të ndryshme, shumë prej tyre përfundojnë në Polici, ku kërkojnë ndihmë për zgjidhjen e telasheve, raporton Gazeta Sinjali.
Një rast i tillë ka ndodhur dje në rrugën ‘Pandeli Sotiri’ në Vushtrri, ku disa persona dyshohet se janë përfshirë në një rrahje.
Burimet e Gazetës Sinjali brenda Prokurorisë kanë bërë me dije se një 41-vjeçar është dërguar në gjendje të rëndë në Emergjencë për trajtim mjekësor dhe pas dhënies së ndihmës së parë, ai është transferuar në Qendrën Klinike Universitare të Kosovës, për trajtim të mëtutjeshëm.
Lidhur me rastin është njoftuar edhe Policia e Kosovës dhe të njëjtit kanë dalë në vendin e ngjarjes, ku kanë kryer ekzaminimet e nevojshme që ndihmojnë në zbardhjen e rrethanave të rastit.
Sipas burimeve të Sinjalit, palët e përfshira në rast kanë miqësi familjare mes vete dhe një 63-vjeçar është arrestuar.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Lëndim i rëndë trupor’.
