Plagoset aksidentalisht 29 vjeçari, dërgohet me urgjencë në spital

Mbajtja dhe përdorimi ia armëve pa autorizim është një dukuri mjaft e shpeshtë në vendin tonë, që jo rrallëherë ka përfunduar me plagosje, por edhe tragjikisht. Pavarësisht kësaj, kosovarët vazhdojnë të mbajnë armë ilegale, duke vepruar kështu kundërligjshëm, e me të cilat rrezikojnë veten por edhe të tjerët, raporton Gazeta Sinjali.

Një rast i tillë ka ndodhur së fundmi në fshatin Duraj të Kaçanikut, ku një person ka pësuar lëndime pasi është vetëplagosur me armë zjarri.

Për shkak të plagëve që ka marrë në këmbë, i njëjti është dërguar në Emergjencën e Spitalit Rajonal e më pas është transferuar në Qendrën Klinike Universitare të Kosovës.

Burimet nga spitali kanë bërë me dije për Sinjalin se viktima është lënduar aksidentalisht, por është jashtë rrezikut për jetë.

Posa Policia është njoftuar për rastin, ka dalë në vendin e ngjarjes, me ç’rast është konfiskuar arma që e ka përdorur i dyshuari, gëzhoja dhe disa fishekë.

Në lidhje me rastin është vënë në dijeni edhe Prokurori i Shtetit, me urdhër të së cilit kanë nisur hetimet ndaj të dyshuarit për dy vepra penale, shkaktim i rrezikut të përgjithshëm dhe armëmbajtja pa leje.