Sulmohen dy të rinj, dërgohen në gjendje të rëndë në QKUK

Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes të rinjve në vendin tonë. Për pasojë, konfliktet jo rrallëherë eskalojnë edhe në rrahje brutale, për çka nevojitet ndërhyja e Policisë, raporton Gazeta Sinjali.

Një rast i tillë ka ndodhur të shtunën në rrugën “Faton Shabani” në Prishtinë, ku dy të rinj janë sulmuar brutalisht me mjete të forta nga disa persona, të cilët akoma s’janë identifikuar.

Burimet e Sinjalit kanë bërë me dije se dy viktimat, një 31-vjeçar dhe një 36-vjeçar, janë dërguar në Qendrën Klinike Universitare të Kosovës për trajtim mjekësor, si pasojë e lëndimeve të rënda që kanë pësuar.

Lidhur me rastin është vënë në dijeni edhe Prokurori i Shtetit, i cili ka iniciuar rast në drejtim të veprës penale “Lëndim i rëndë trupor” dhe ka urdhëruar ndërmarrjen e veprimeve të nevojshme hetimore për kapjen e të dyshuarve.