Punëtori i ndërtimtarisë lëndohet në vendin e punës, dërgohet me urgjencë në QKUK
Punëtorët në Kosovë përballen me sfida të shumta, e ndër to janë edhe kushtet në vendet e punës dhe rreziku që u kanoset. Jo rrallëherë ata e pësojnë keq, qoftë në ndërtimtari, apo edhe në sektorë të tjerë, raporton Gazeta Sinjali.
Një rast i tillë ka ndodhur të premten në fshatin Opterushë të Rahovecit, ku një person teksa po kryente punë në një objekt ndërtimor, ka pësuar lëndime serioze dhe është dërguar me urgjencë në spital.
Burimet e Gazetës Sinjali brenda Emergjencës bëjnë me dije se bëhet fjalë për një 24-vjeçar, i cili tashmë po trajtohet në Qendrën Klinike Universitare të Kosovës.
Ndërsa në vendin e ngjarjes kanë dalë njësitë policore edhe inspektorët e punës të cilët kanë kryer ekzaminimet nëse janë plotësuar apo jo kushtet e punës dhe masat e sigurisë.
Me urdhër të Prokurorit të Shtetit rasti është iniciuar si “Asgjësim, dëmtim ose heqje e pajisjeve mbrojtëse dhe rrezikshmërinë e sigurisë në vendin e punës”.
