Gashi: Boll ma, Qeveria e Albinit me korrupsion, afera, sanksione e dështime duhet të shkarkohet

Shefi i Grupit Parlamentar të Lidhjes Demokratike të Kosovës, Arben Gashi, ka thënë se Qeveria e udhëhequr nga Albin Kurti, duhet të shkarkohet, raporton Gazeta Sinjali.

Përmes një postimi në rrjetin social Facebook, Gashi ka thënë se qeverisja e Kurtit identifikohet me korrupsion, afera, sanksione e dështime.

“Boll ma! Kjo qeveri duhet te shkarkohet, vendit i duhen zgjedhje. Qeverisja e Albinit identifikohet me korrupsion, afera, sanksione, deshtime…”, shkroi ai.

Ndryshe, ky reagim vjen pas aksionit të sotëm të Prokurorisë Speciale të Republikës së Kosovës dhe Policisë, të cilët kryen bastisje në Ministrinë e Industrisë, Ndërmarrësisë dhe Tregtisë dhe në furrën e shndërruar në restorantin ‘Bukë e zemër’ dhe banesën e pronarit të saj, Ridvan Muharremi. Muharremi dhe dy zyrtarët e MINT-it, Irfan Lipovica dhe Hafiz Gara, u arrestuan nën dyshimet për kryerjen e veprave penale “Keqpërdorim i detyrës zyrtare”, si dhe “Dhënie të ndihmës në kryerjen e veprës penale të Keqpërdorimit të detyrës zyrtare”.

Të njëjtit me urdhër të Prokurorit të Shtetit, do të dërgohen në mbajtje për 48 orë, si dhe brenda afateve ligjore kohore do të bëhet kërkesë për caktimin e paraburgimit.

Ndërkaq, gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore.