Bajrami: Kryepërgjegjësi është Albin Kurti, pushteti i VV-së po kundërmon drogë e korrupsion

Deputetja e Kuvendit të Republikës së Kosovës nga radhët e Lidhjes Demokratike të Kosovës, Hykmete Bajrami, ka reaguar pas aksionit të Policisë së Kosovës në bashkëpunim me Prokurorinë Speciale, ku u arrestuan dy zyrtarët e Ministrisë së Industrisë, Tregtisë dhe Ndërmarrësisë, Hafiz Gara dhe Irfan Lipovica, si dhe Ridvan Muharremi, i cili dyshohet se është i përfshirë në keqpërdorimet me rezerva shtetërore, raporton Gazeta Sinjali.

Përmes një postimi në rrjetin social Facebook, Bajrami ka thënë se kryepërgjegjësi është kryeministri i vendit, Albin Kurti, teksa ka bërë thirrje tek organet e drejtësië që t’i shkojnë deri në fund aksionit për keqpërdimin e rezervave shtetërore.

Sipas Bajramit, Qeveria e udhëhequr nga Lëvizja Vetëvendosje po kundërmon drogë, korrupsion dhe pazarllëqe në kurriz të popullit.

“Përgjegjësinë kryesore duhet ta kërkojmë te Kryeministri Albin Kurti. Kryetari i Vetëvendosjes është kryepërgjegjësi për funksionimin e secilit dikaster, është përgjegjës edhe për keqpërdorimin e rezervave shtetërore, duke marrë për bazë faktin se një mik i tij komplet jashtë institucioneve përfshihet në tenderë. Ai dhe ministrat e tij duhet gjithashtu të mbahen përgjegjës për përfshirjen e zyrtarëve të Vetëvendosjes në kontrabandë me drogë, për koordinimin e Mimoza Kusarit me Radojcicin, për hajnitë në KEK për nepotizmin dhe të gjitha skandalet tjera.  Sepse i ka marrë 51 për qind të votave me propagandë që kushdo që s’është me LVV është hajn dhe të gjithë ata që ju bashkuan turmës me 14 shkurt 2021 janë pastërtia vet, por në fakt pushteti i Vetëvendosjes po kundërmon drogë, korrupsion dhe pazarllëqe në kurriz të popullit”, shkroi ajo.

Ndryshe, sipas PSRK-së, tre të arrestuarit dyshohen për veprat “Keqpërdorim i detyrës zyrtare”, si dhe “Dhënie të ndihmës në kryerjen e veprës penale të Keqpërdorimit të detyrës zyrtare”.

Me urdhër të prokurorit, Muharremi, Gara dhe Lipovica janë dërguar në mbajtje për 48 orë dhe brenda afatit ligjor pritet që të parashtrohet kërkesë për caktimin e masës së paraburgimit.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.