Nxënësit i bie thika nga xhepi në orë të mësimit, përfundon në pranga

Mbajtja e armëve nga të miturit tashmë është bërë dukuri që po shqetëson prindërit dhe shoqërinë, mirëpo kjo dukuri duket se i ka prekur edhe fëmijët, shkruan Gazeta Sinjali.

Një dukuri e tillë, sa shqetësuese aq edhe alarmante është vërejtur në Shkollën e Mesme Profesionale ‘Adem Gllavica’ në Lipjan, ku një nxënës është kapur me një mjet të mprehtë.

Burimet e Gazetës Sinjali brenda Prokurorisë kanë bërë me dije se 17-vjeçari është kapur mat në orën mësimore, pasi thika që mbante me vete, i ka rënë nga xhepi.

Njësitë policore kanë dalë në vendin e ngjarjes ku kanë sekuestruar thikën, teksa të miturin e kanë shoqëruar në stacion policor për intervistim.

Me urdhër të prokurorit, i mituri është dërguar në mbajtje dhe do të hetohet për veprën penale ‘Mbajtje në pronësi, kontroll ose posedim të paautorizuar të armës’.