Detaje nga aksidenti me fatalitet që ndodhi sot
Për shkak të pamjeve të rënda foto nuk do të publikohet.
Një person ka humbur jetën mëngjesin e sotëm, pasi u godit nga një kamion në rrugën ‘Hajrullah Zymi’ në Fushë Kosovë, raporton Gazeta Sinjali.
Zëdhënësja e Policisë së Kosovës për Rajonin e Prishtinës, Flora Ahmeti, ka dhënë detaje për Sinjalin, duke thënë se këmbësorja s’ka arritur që t’i përballojë plagët e marra dhe ka ndërruar jetë në vendin e ngjarjes.
Po ashtu, sipas Ahmetit, shoferi që dyshohet se shkaktoi aksidentin është shoqëruar në stacion policor për intervistim.
“Sot rreth orës 10:00 kemi pranuar informatën se në rrugën “Hajrullah Zymi” në Fushë Kosovë, ka ndodhur një aksident trafiku me pasoja fatale.
Në këtë aksident, kanë qenë të përfshirë një këmbësore dhe një automjet në lëvizje (kamion) .
Vdekjen e viktimës e ka konstatuar ekipi mjekësor në vendngjarje.
Aktualisht policia ka nisë një hetim për zbardhjen e rrethanave që kanë quar deri te ky aksident trafiku, ndërkohë që ngasësi automjetit është shoqëruar në stacion policor”, tha Ahmeti për Sinjalin.
