Gjendet mi i ngordhur në produktet e “Apetit”

Në produktet e mishit të kompanisë “Apetit Group”, saktësisht në suxhukun që prodhohet në fabrikat e mishit të kësaj kompanie, është gjetur një “mi i ngordhur”.

Rastin fillimisht e ka raportuar një qytetar në Policinë e Kosovës, i cili ka treguar se në paketimin e suxhukut nga “Apetit”, të blerë në një market ka gjetur një mi të ngordhur.

Policia më pas ka njoftuar Agjencinë e Ushqimit dhe Veterinarisë, më datën 25 gusht.

Nga Agjencia e Ushqimit dhe Veterinarisë kanë konstatuar se në produktin që kanë inspektuar, kanë konfirmuar se bëhet fjalë për paketim të kompanisë “Apetit”.

“Është vërejtur qartë se produkti është prodhuar nga subjektit operatori ekonomik Apetit. Në një pjesë të ndarë të produktit në pamje vizuale është konstatuar se është një mi i ngordhur. Ekipi inspektues menjëherë me prezencën e policisë ka nisur ndërmarrjen e veprimeve për gjurmim të rastit”, thuhet në përgjigjen e AUV, raporton Albanian Post.

Është e njëjta kompani që ka tenderë nga institucionet e Kosovës për të furnizuar me produkte të mishit Qendrën Klinike Universitare të Kosovës, të gjitha spitalet e Kosovës, të gjitha Qendrat e Shëndetit Mendor, Qendrën Studentore të Kosovës, burgjet e Kosovës dhe shumicën dërrmuese të komunave të Kosovës.

Gjithashtu “inspektorët në ekip të përbashkët me policinë kanë ushtruar kontroll të menjëhershme tek marketi”.

“Ne ekspozim ne shitje është gjetur një sasi prej 25.14 kg suxhuk i përpunuar dhe paketuar nga subjekti Apetit me nr. lloti 216-1/254; dt. paketimi 09.08.2024 dhe skadence 23.09.2024”, ka njoftuar AUV.

E njëjta sasi, siç sqarojnë nga Agjencia e Ushqimit “menjëherë është larguar nga shitja”.

Të nesërmen, më 26 gusht, “Inspektorati Veterinar i AUV-së ka ushtruar kontroll të detajuar në Fabrikës e përpunimit të mishit, ne lidhje me gjetjen e dëshmive apo fakteve të cilat mund të japin argumente për të vërtetuar apo mbështetur dyshimin e ngritur”.

“Në kontroll fokusi qendrorë ka qen kontrolli i higjienës dhe masave mbrojtëse të vetë kontrollit nga operatori ekonomik ne lidhje me parandalimin e kontaminimit te produkteve sidomos me agjent fizik“.

Në prill të këtij viti, emisioni “Stop” në Shqipëri, pati dokumentuar përmes videove se si një nga pronarët e Kompanisë “Apetit” në Kosovë, pranonte se mund të falsifikojë dokumente dhe mishin e Brazilit ta shes si mish të Kosovës.

Përmes kamerës së fshehur dëshmohej se si mishi i Brazilit paketohej si mish i Kosovës dhe shitej si eksport nga kjo fabrikë.

Në video, njëri nga pronarët e kompanisë, i pranon gazetarit se ai mund ta ndryshojë vendin e origjinës së mishit dhe t’ia falsifikojë, duke ia shitur si mish i Kosovës.

Ministri i Bujqësisë, Faton Peci, pati dalë në mbrojtje të kësaj kompanie në atë kohë.

Në një emision në Kanal 10, ai madje thoshte se “mishi i Brazilit është shumë kualitativ” dhe se Brazili është një nga eksportuesit më të mëdhenj në botë.

Që nga viti 2022 kompania “Apetit Group” dhe kompania tjetër me të njëjtit pronarë “Riki” janë të kontraktuar nga shteti i Kosovës, që të furnizojnë të gjitha spitalet dhe institucionet e tjera të shëndetit në Kosovë me mish pule dhe mish gjedhi.