“Pastrimi” iu jep dy ditë afat për t’i paguar borxhet e mbeturinave

Kompania Regjionale e Mbeturinave “Pastrimi” ka paralajmëruar se do të bëjë procedimin e borxheve në procedurën përmbarimore tek përmbaruesit privat.

Siç bëhet e ditur përmes një njoftimi, procedimi i borxheve do të bëhet për klientët e amvisërisë, bizneseve dhe institucioneve përfshirë edhe institucionet publike të cilat kanë borxhe për faturat e mbeturinave.

“Kompania Regjionale e Mbeturinave “Pastrimi” pas njoftimeve të vazhdueshme ne media, rrjete sociale si dhe njoftimeve përmes vërejtjeve për pagesë të mbeturinave, njofton që do të bëjë procedimin e borxheve në procedurën përmbarimore tek Përmbaruesit Privat”, thuhet në njoftim.

“Po ashtu, njoftojmë gjithë klientët që Kompania “Pastrimi”, ofron mundësinë e marrëveshjes për riprogramim të borxheve me këste deri 12 muaj”.

“Ju bëjmë thirrje gjithë klientëve të Kompanisë “Pastrimi”, SH.A që të përmbushin obligimet e tyre që kanë ndaj kompanisë sonë sepse në rast të mospagesës së obligimeve (borxheve), ju njoftojmë që borxhet e pa paguara pas datës 06 Shtator 2024 do të procedohen tek Përmbaruesit Privat”, thuhet tutje në njoftimin e “Pastrimit”.