Përurohet shkolla e re në Dumosh të Podujevës

Kryeministri i Kosovës, Albin Kurti së bashku me kryetarin e Podujevës, Shpejtim Bulliqi, sot gjatë ditës kanë qenë në Dumosh të Podujevës.

Aty është bërë inaugurimi i shkollës së re të këtij fshati.

Ky projekt është realizuar me një investim prej afër 585 mijë euro nga Komuna e Podujevës.

Më poshtë postimi i kryetarit Bulliqi:

Inauguruam shkollën e re në Dumosh

Bashkë me Kryeministrin e Kosovës, z. Albin Kurti, Ministren e Arsimit, Shkencës, Teknologjisë dhe Inovacionit, znj. Arberie Nagavci, deputetë, drejtorë dhe asamblistë komunal si dhe banorë të fshatit Dumosh kemi përuruar shkollën e re “Musli Dumoshi” në Dumosh, një projekt madhor i realizuar me një investim prej 584,807.94 nga ana e Komunës së Podujevës.

Kjo shkollë e re do të ofrojë kushte të mira për mësimdhënie dhe mësimnxënie. Këtu, brezat e rinj do të marrin mësimet e para, do të mësojnë të lexojnë dhe shkruajnë, do të formojnë bazat e dijes së tyre, që do t’i ndihmojë ata të ndërtojnë një jetë të suksesshme në të ardhmen.

Ky investim iu dedikohet veçanërisht fëmijëve andaj le ta gëzojnë shkollën e re!
Shfrytëzoj që me këtë rast nxënësve dhe mësimdhënësve të shkollës t’u uroj edhe vitin e ri shkollor, duke u dëshiruar suksese e mbarësi!