‘Loja në TikTok’ dyshohet se nxiti edhe tri nxënëse të lëndojnë veten në duar

Tri nxënëse të klasave 6 deri 9 në Gjakovë dyshohet se e kanë lënduar vetën në duar me mjete të mprehta, të nxitura nga një video (lojë) në ‘Tiktok’.

Sipas drejtoreshës së Arsimit në Gjakovë, Eranda Kumanova- Baçi, dyshohet se dy nga nxënëset e lënduan veten shumë më parë këtë vit, ndërsa nxënësja e tretë e ka lënduar veten në muajin shtator.

Kumanova- Baçi tha se nxënëset janë mirë me shëndet, ndërsa rastet janë raportuar edhe në Policinë e Kosovës më 07.10.2024 dhe janë duke u trajtuar edhe nga Prokuroria Themelore në Gjakovë.

KALLXO.com e ka pyetur Prokurorinë në Gjakovë lidhur me veprimet që janë ndërmarr deri më tani nga ana e tyre për këto tri raste të nxënëseve që kanë lënduar veten, por nuk kanë pranuar të japin informata.

“Prokurori i Shtetit së bashku me Policinë e Kosovës, janë duke i ndërmarr të gjitha veprimet e duhura hetimore, ashtu që veprimet hetimore për këtë rast janë duke vazhduar në bashkëpunim me Policinë. Për shkak të ndjeshmërisë së rastit nuk mund të japim më shumë informata lidhur me këtë rast” – thuhet në përgjigjen e Prokurorisë së Gjakovës, më 08.10.2024.

Me këtë numër të nxënëseve në Gjakovë që kanë lënduar veten në duar për shkak të video (lojës) në ‘TikTok’, këtë vit Kosova është ballafaquar me 23 nxënës viktima të këtij trendi.

Para se të identifikoheshin të tri nxënëset në Gjakovë se e kanë lënduar veten, drejtoresha e Arsimit, Eranda Kumanova- Baçi në një bisedë për KALLXO.com tha se një prind e kishte kontaktuar të premten vonë, më 04.10.2024, se vajza e tij e kishte lënduar veten.

Me këtë rast, drejtoresha Kumanova- Baçi thotë se kishte dyshuar dhe menjëherë u ka shkruar drejtorëve të shkollave në Gjakovë që t’i kontrollojnë nxënësit nëse kanë lëndime të tilla.

Sipas Kumanova-Baçit, dyshohet se nxënëset e lënduan veten me mjete të mprehta në duar për shkak të një video (loje) në ‘TikTok’.

Si rrjedhojë, drejtorët e shkollave në Gjakovë së bashku me psikologët dhe kujdestarët e klasave i kanë kontrolluar nxënësit më 07.10.2024, ashtu siç u kishte kërkuar Kumanova- Baçi.

“Dje [07.10.2024]  kanë fillu drejtorët me dalë nëpër klasa me psikologë, me kujdestarët e klasave dhe kanë fillu m’i kontrollu dhe kanë hasë në tri raste, mirëpo unë e informova dje edhe Policinë edhe tash të tre rastet Policia i ka në hetim. Dy nga rastet si duket janë të mëhershme dhe janë t’u hetu dhe rasti i tretë është i ditëve të fundit, po krejt janë në hetime. Ju kanë marrë telefonat, ju kanë konfisku Policia” – ka thënë ajo.

Në të njëjtën ditë, për këto raste të nxënëseve që u identifikuan se e kanë lënduar veten, ajo i ka njoftuar Policinë e Kosovës.

Nxënëset që dyshohet se e kanë lënduar veten në duar janë të klasave 6 deri 9, dy prej tyre, Kumanova- Baçi ka treguar se janë të së njëjtës shkollë, por të klasave të ndryshme. Kurse, nxënësja e tretë është në një shkollë tjetër në Gjakovë.

Kumanova- Baçi nuk ka pranuar të jap informata se nga cilat shkolla të Gjakovës janë tri nxënëset që e kanë lënduar veten, pasi është këshilluar nga Policia që të mos i jap këto informata për shkak të hetimeve.

Sipas informacioneve të KALLXO.com, dyshohet se bëhet fjalë për dy shkolla në qytetin e Gjakovës.

“Sfida është që këto kanë fotografu vetën [pasi e kanë lënduar veten], e fotografojnë veten dhe si duket Policia i ka hetu edhe i ka gjet në telefon fotografitë… Ato janë mirë, ato e kanë kry ma herët këtë [vetëlëndimin]. Dy raste janë shumë më të hershme, rasti i ditëve të fundit është diku i muajit shtator, mirë është ajo [nxënësja]” – ka theksuar Kumanova- Baçi.

Kumanova- Baçi ka bërë të ditur se prindërit e tri nxënëseve janë kontaktuar nga Policia, ndërsa të martën, më 08.10.2024, ajo është takuar me zyrtarët policorë, të cilët e kanë njoftuar zyrtarisht se janë këto tri raste të nxënëseve që e kanë lënduar veten.

“I ka thirrë [prindërit] menjëherë Policia, e dinë edhe Prokuroria edhe krejt është t’u u marrë me tri rastet” – tha ajo.

Më tej, Kumanova- Baçi njoftoi se drejtorët e shkollave do t’i thërrasin prindërit për t’i njoftuar për këto raste të paraqitura të nxënëseve që kanë lënduar veten.

“Drejtorët e shkollave … kanë m’i thirrë prindërit, me mbajt një takim me prindërit edhe me pa, a ka raste të tjera dhe më informu menjëherë Policinë, d.m.th menjëherë si ta shohin një shenj që dyshojnë që është prerje, menjëherë informohet Policia” – ka shtuar Kumanova- Baçi.

Sipas saj, të gjitha shkollat në Gjakovë kanë psikologë, ndërsa ka edhe prej mësimdhënësve që janë të trajnuar për t’i trajtuar këto raste në shkolla.

“Të trajnuar për këso raste janë, muj me thanë kështu me sinqeritet, që janë profesorët e Edukatës Fizike, sepse ata japin gjithmonë ndihmën e parë kur ndodhë diçka në shkollë, a e din, i kemi ata për çdo rast” – është shprehur Kumanova- Baçi.

Ajo tha se deri në ato momente nuk është kontaktuar nga Ministria e Arsimit për këto raste të nxënëseve që kanë lënduar veten, ndërsa e ka informuar menjëherë kryetarin e Komunës së Gjakovës, Ardian Gjini.

Kur u pyet për 20 nxënësit të shkollave në Fushë Kosovë dhe Lipjan që u raportuan në fund të muajit maj, 2024, se e kanë lënduar veten në duar të nxitur nga një video (lojë) në TikTok, Kumanova- Baçi deklaroi se kanë mbajtur një takim në muajin qershor me drejtorë të shkollave e zyrtarë policorë për mundësinë e shfaqjes së rasteve të ngjajshme në qytetin e tyre.

“Po, e di e tash po të tregoj që na e kemi mbajt një takim me drejtorët e shkollave në qershor (2024) dhe me Policinë edhe i kemi informu që në qoftë se mundet me na ndodhë dhe atëherë ke fundi i vitit si duket mbarojë shkolla” – është përgjigjur Kumanova- Baçi.

Në anën tjetër, më 30.05.2024, janë raportuar 17 raste të nxënëseve të shkollave fillore të mesme të ulët “Mihal Grameno” dhe “Daut Bogujevci” në Fushë Kosovë që i kanë gërvishtur duart e tyre, të nxitur nga një video (lojë) në “Tiktok”.

Ndërsa, më 31.05.2024, KALLXO.com ka raportuarse tre nxënës nën moshën 14-vjeçare të shkollës fillore të mesme të ulët “17 Shkurti” në fshatin Gllogovc të Komunës së Lipjanit, kishin lënduar dorën e tyre të majtë me mjete të mprehta, të nxitur po ashtu nga një video (lojë) në “TikTok”.

Ministria e Arsimit nuk ka pasur ndonjë reagim zyrtar kur u raportuan 20 nxënësit e shkollave në Lipjan e Fushë Kosovë se kanë lënduar veten, e KALLXO.com e ka pyetur Ministrinë se a do të reagojë pas këtyre tri rasteve të reja në Gjakovë, por nuk ka pranuar përgjigje deri në publikimin e këtij artikulli.