32 vjeçari shqiptar gjendet i vdekur në këtë shtet

Një ngjarje e rëndë ka tronditur zonën turistike të liqenit Garda në Itali, ku një i ri shqiptar është gjetur pa shenja jete brenda dhomës së një resorti me pesë yje.

Viktima, një 32-vjeçar shqiptar, identiteti i të cilit ende nuk është bërë i ditur, u zbulua nga stafi i hotelit pasditen e 11 marsit. Sipas informacioneve paraprake, i riu kishte mbërritur në resort i vetëm dhe kishte qëndruar aty për rreth 24 orë.

Alarmi u ngrit nga punonjësit e resortit pasi 32-vjeçari nuk po i përgjigjej thirrjeve dhe trokitjeve në derën e dhomës. Pasi hynë brenda, stafi u përball me skenën e rëndë dhe njoftoi menjëherë urgjencën dhe forcat e rendit. Pavarësisht mbërritjes së mjekëve, për të riun nuk mund të bëhej asgjë pasi kishte ndërruar jetë.

Autoritetet italiane kanë nisur menjëherë hetimet për zbardhjen e shkaqeve të vdekjes. Sipas mediave vendase, hetuesit kanë gjetur pranë shtratit të viktimës disa pako ilaçesh të boshatisura.

Grupi hetimor po shqyrton gjithashtu lëvizjet e fundit të 32-vjeçarit dhe komunikimet e tij për të kuptuar gjendjen psikologjike që mund ta ketë çuar drejt këtij vendimi tragjik.