Ministria del me njoftim zyrtar për të treguar nëse Maqedonci ka ofruar dorëheqje

Ministria e Mbrojtjes së Kosovës ka demantuar lajmin se Ejup Maqedonci ka ofruar dorëheqje nga posti i ministri.

“Ministri Maqedonci nuk ka ofruar dorëheqje, një gjë e tillë nuk ka ndodhur dhe nuk planifikohet të ndodhë”- thuhet në një reagim të shkurtër të kësaj Ministrie.

Reagimi i Ministrisë së Mbrojtjes erdhi pas një deklarimi të deputetes së PDK-së, Ganimete Musliu, në TV Dukagjini se ka informacione të paverifikuara se ministri Maqedonci ka ofruar dorëheqjen e tij te kryeministri Albin Kurti.

“Kam informacione të pavërtetuara që Maqedonci e ka dorëzuar dorëheqjen te Albin Kurti, por që ende nuk e ka konfirmuar Albin Kurti. Kështu që ata njerëz që kanë kontribuuar me dekada në forcimin e shtetit, në forcimin e ushtrisë së Kosovës, unë jam shumë e bindur nuk pranojnë të poshtërohen në këtë mënyrë nga Albin Kurti dhe njerëz parazitë që janë rreth Albin Kurtit” – ka thënë Musliu.

Musliu ka drejtuar kritika të shumta në adresë të Qeverisë rreth politikave të mbrojtjes dhe zhvillimeve të fundit në FSK.