SBASHK-u paralajmëron protestë dhe grevë
Kryetari i SBASHK-ut Rrahman Jasharaj, ka paralajmëruar protestë dhe grevë.
Ai tha se mos plotësimi i kërkesave nga qeveria e Ministria e Arsimit, është shkaku për këtë.
Sipas tij, ministrja e Arsimit Arbërie Nagavci ka dy vjet që po i injoron mësimdhënësit në kërkesat e tyre.
“S’kemi asnjë sinjal për kërkesat tona nga ministrja Nagavci që dy vite vetëm na injoron”, deklaroi Jasharaj për “Front Online”, përcjell Klankosova.tv.
Ai ka bërë të ditur se çfarë do të veprojnë për ta kundërshtuar qasjen e qeverisë dhe MASHT-it.
“Jemi duke biseduar me anëtarësinë, çka nëse vazhdohet me qasjen e gabuar të qeverisë e Nagavcit. Komisioni do të vendos dhe nëse vazhdohet kështu do të ketë veprime sindikale, do të kemi fillimisht protestë e nëse nuk ka rezultat pozitiv, do të vazhdojmë me greva”, deklaroi Jasharaj.
Me rritjen e pagës nga janari për 55 euro nuk janë ndarë të kënaqur mësimdhënësit, thotë kreu i SBASHK-ut.
Sipas Jasharajt, rritja e pagave është dashur të rritet nga muaji nëntor, jo nga janari dhe me një shumë tjetër.
“Deklarimi për rritjen e pagave e ka shtuar edhe më shumë pakënaqësinë tek anëtarësia. I tërë sektori publik është tepër i pakënaqur. Është dashur tani ti rrisin pagat e jo nga janari dhe jo aq pakë”, tha kreu i SBASHK-ut.
Tutje, Jasharaj vlerësoi se premtimi i rritjes së pagës nga qeveria nuk është i bazuar në ligj.
“Ngritja ironike 55 euro në janar është e pamundur se Murati ka të drejtë me ligj të lëviz me vlerën e koeficientit por me vetë koeficient as ai as Kurti s’kanë të drejtë”.
