Doarsa Kica Xhelili kalon në partinë e Lumir Abdixhikut
Deputetja e Kuvendit të Republikës së Kosovës, Doarsa Kica Xhelili, tash e një kohë është kryefjalë e mediave për lëvizjet e saj në partitë politike. Ndonëse ajo vetë ende nuk e ka konfirmuar, raportohet se Kica Xhelili ka dhënë dorëheqje nga Lista Guxo dhe pritet të aderojë në një tjetër parti, raporton Gazeta Sinjali.
Burimet e Gazetës Sinjali kanë bërë të ditur se deputetja më aktive e Listës Guxo, pritet t’i bashkohet Grupit Parlamentar të Lidhjes Demokratike të Kosovës.
Zyrtarizimi i kalimit të deputetes në LDK, pritet të bëhet pas pak ditësh, ndërkohë që vetë kreu i partisë, Lumir Abdixhiku, gati një javë më pari ka deklaruar se vlerëson Kica Xhelilin dhe do ishte nder që një parti të ketë në radhët e veta një si ajo.
E se Grupi Parlamentar i LDK-së pritet të rritet, e ka bërë të ditur edhe vetë shefi i deputetëve të kësaj partie, Arben Gashi, i cili nuk ka dhënë më shumë detaje se kush janë deputetët që pritet t’i bashkohen partisë më të vjetër në vend.
