Ministria e Arsimit heq dorë nga doracaku skandaloz

Ministria e Arsimit ka hequr zyrtarisht dorë nga doracaku për edukimin seksual dhe shëndetin riprodhues.

Në një njoftim të nxjerrë të premten, MASHT tha se doracaku do të largohet nga përdorimi në institucionet arsimore deri në përfundim të rishikimit të tij nga një komision i brendshëm.

“Po ashtu, njoftojmë mësimdhënësit dhe prindërit se doracakët do të largohen nga përdorimi dhe nga faqja zyrtare e MASHTI-t deri në përfundim të rishikimit nga komisioni me ekspertët më të mirë në vend dhe të gjitha palët kompetente që i japin siguri e qartësi këtij procesi. MASHTI është institucioni i vetëm kompetent me autoritetin ligjor për këtë çështje. Në këtë linjë, çdo vendim jokompetent nga institucionet komunale nuk prodhon asnjë efekt juridik. Së bashku do të bëjmë më të mirën për fëmijët tanë”, thuhet në njoftim.

Në njoftim thuhet se Ministria e Arsimit nuk ka kurrikulë të veçantë për edukim seksual.

Me këta doracakë, prej vitit 2019, janë trajnuar më shumë se dy mijë e 500 mësimdhënës.

“Lidhur me doracakët për mësimdhënës, prej vitit 2019 janë trajnuar më shumë se 2500 mësimdhënës. Deri tani nuk ka pasur asnjë shqetësim nga asnjë palë, përfshirë ekspertët shëndetësorë, psikologët, mësimdhënësit, drejtorët e shkollave, Drejtoritë Komunale apo palë të tjera në lidhje me përmbajtjen e doracakëve. Pra, nga asnjë mësimdhënës nuk është ngritur kurrë më parë kjo temë. Ministria e Arsimit kujdeset me të gjitha resurset njerëzore për mirëqenien e fëmijëve në vendin tonë. Ndaj këtë proces të rishikimit do ta kryejmë me përgjegjësinë më lartë etike dhe profesionale. Ndërkohë, Ministria e Arsimit kërkon nga të gjithë të përmbahen prej gjuhës tejet të papërshtatshme që po përdoret ditët e fundit”, përfundon njoftimi nga MAShT.

Ky vendim vjen pasi komunat e Prishtinës, Fushë Kosovës, Skënderajt, Drenasit, Vitisë, Lipjanit i ndaluan këta doracakë.