Dumnica e Poshtme po përballet me mungesën e Transportit Publik
Fshati Dumnicë e Poshtme në Komunën e Podujevës po përballet me mungesën e transportit publik që nga muaji qershor, duke krijuar shqetësime të mëdha për banorët e zonës. Për vite me radhë, autobusi ka qenë një mjet i domosdoshëm udhëtimi për shumë qytetarë, të cilët e përdornin për të arritur në shkolla dhe vende pune.
Por, pa asnjë paralajmërim apo shpjegim, ky shërbim i rëndësishëm është ndërprerë. Banorët shprehin shqetësimin se për shumë prej tyre transporti publik ishte e vetmja alternativë efikase udhëtimi, pasi një pjesë e madhe e familjeve nuk posedojnë më shumë se një veturë. Tani, ata janë të detyruar të mbështeten në taksi të improvizuara, të cilat nuk operojnë me orare të rregullta.
Disa qytetarë kanë bërë ankesa të shumta drejtuar Komunës së Podujevës, duke kërkuar rikthimin e këtij shërbimi, por raportojnë se këto kërkesa janë injoruar. Banorët kritikojnë mungesën e transparencës dhe llogaridhënies nga ana e kryetarit të Komunës lidhur me këtë çështje.
Në një letër të dërguar redaksisë sonë, qytetarët i bëjnë thirrje Komunës që të ndërmarrë hapa konkretë për të rikthyer transportin publik në fshat, duke theksuar rëndësinë e tij për jetën e përditshme të banorëve.
Portali Podujeva Sot do të vazhdojë të ndjekë këtë çështje dhe do të ju mbajë të informuar.
