“Garë” në LDK për fotografim me Doarsën, sikur më 2019 me Vjosën (FOTO)

Kryetari i Lidhjes Demokratike të Kosovës, Lumir Abdixhiku, këtë të enjte zyrtarizoi kalimin e deputetes Doarsa Kica-Xhelili në LDK. Ai ka thënë se shkuarja në LDK e deputetes së grupit parlamentar të Lëvizjes Vetëvendosja nga “Lista Guxo” është vlerë dhe se për këtë janë të lumtur të gjithë.

“Sot (dje), Lidhjes Demokratike të Kosovës, iu bashkua deputetja e Kuvendit të Kosovës, Doarsa Kica Xhelili. Si politikane aktive e profesioniste e shquar, ardhja e saj në LDK është vlerë. Për këtë jemi të lumtur të gjithë. Me Doarsën kemi biseduar gjatë mbi politikën, aktivizmin dhe vizionin e Lidhjes tonë për vendin. Pikëpamjet e saj për Kosovën, për të tashmen e të ardhmen e brezave të këtij vendi – për drejtësinë në veçanti – janë vlera që provojmë t’i shpërfaqim me këmbëngulësi në çdo veprim tonin politik”.

“Kemi folur për LDK-në, idetë tona përpara dhe nevojën e ndërtimit të kësaj rruge së bashku me më të mirët e vendit. Ky është qëllimi ynë; Doarsa është e tillë, prandaj dhe rrugëtimi ynë i natyrshëm. Ajo ka shumë për t’i dhënë Lidhjes Demokratike të Kosovës, anëtarësisë sonë e idealeve tona të përbashkëta në rrugën e gjatë që na pret përpara”, shkroi Abdixhiku në Facebook.

Por kjo ka bërë edhe njëherë që LDK të shfaq një ‘eufori’ për t’u fotografuar me një anëtar/e të re të këtij subjekti, gjë që tashmë duket se në këtë parti është bërë trend, njofton Klankosova.tv.