Aksidenti ajror në Turqi ndodhi në kazermën ku stërviten edhe pjesëtarët e FSK-së

Ministri i Mbrojtjes, Ejup Maqedonci ka ngushëlluar auroritetet turke për aksidentit ajror që ka ndodhur sot në një provincë jugpërëndimore në Turqi.

Maqedonci ka njoftuar se pikërisht në këtë qendër stërviten edhe ushtarët e FSK-së, por për fat të mirë ata nuk janë të përfshirë në aksidentin tragjik.

“Jashtëzakonisht i tronditur me lajmin e sotëm rreth aksidentit ajror me fatalitet, që ka ndodhur në regjionin në Isparta ku komanda e Shkollës së Aviacionit Tokësor të Ushtrisë Turke kryen trajnimet.

Shpreh ngushëllimet e mia më të sinqerta autoriteteve shtetërore turke, ministrit Yaşar Güler, Forcave të Armatosura Turke dhe familjarëve të ushtarakëve të vdekur.

Fatmirësisht, pjesëtarët e FSK-së të cilët aktualisht janë duke ndjekur trajnimet në këtë kazermë kanë qenë larg vendit të incidentit dhe janë mirë e të sigurt.

Në këto momente të vështira ndajmë dhimbjen me popullin turk.

Qoftë i paharruar kujtimi për martirët”, shkruan ministri në njoftim./Indeksonline/