Gazetarja Qëndresa Bellagoshi merr çmimin e parë të AGK-së për antigjipsizëm

Gazetarja e Klan Kosovës, Qëndresa Bellagoshi, është shpërblyer me vendin e parë nga Asociacioni i Gazetarëve të Kosovës, për raportimin e saj për antigjipsizëm.

Bellagoshi, në ceremoninë e ndarjes së çmimit ku u shpërblye për storien se si 169 fëmijë të një lagjeje nga komunitetet pakicë në Gjakovë nuk janë regjistruar fare në shkollë, ndau një letër në të cilën personazhi i stories së saj, që është një vajzë, i kishte shkruar disa shkronja përmes së cilave kishte tentuar ta shkruante emrin e saj, por që në fakt nuk kishte arritur ta bënte atë.

“Do të doja që t’i shihni këto shkronja që sipas vajzës që është personazhi i stories, është emri i saj, që në fakt nuk është. Këto shkronja, ajo i ka lidhur nga ato që i ka parë në një tekst shkollor, që e ka marrë gjatë kohës sa ka qenë duke kërkuar në kosh mbeturinash”.

“Duke shpresuar që të kemi sa më pak storje të tilla dhe sa më pak raste të tilla për të raportuar, i falënderoj të gjithë ata që kanë kontribuar në përzgjedhjen dhe redaksinë për mbështetjen në trajtimin e temave të tilla, gjersa shpresojë që viteve të ardhshme të shpërblehemi e të ftohemi kur raportojmë për sukseset e kthimit të fëmijëve në shkollë, veçanërisht të atyre të komuniteteve jo shumicë”, tha Bellagoshi, njofton Klankosova.tv.