Kurti prezanton kandidatët për deputetë, kërkon 500 mijë vota

500 mijë është numri i votave që Albin Kurti ka kërkuar nga qytetarët e Kosovës në zgjedhjet parlamentare të 9 shkurtit 2025, për ta formuar kështu qeverinë i vetëm përsëri.

Këtë, Kurti e ka bërë në një tubim me simpatizantët në sallën 1 tetori në Prishtinë, në prezantimin e kandidatëve për deputetë nga radhët e LVV-së, ku tha se këto vota janë të nevojshme që të mos varen nga Lista Serbe, por as nga partitë tjera opozitare shqiptare, të cilat i quajti “të stërvjetëruara”.

“500 mijë vota nuk është thjesht aspiratë sa për kuriozitet, por është më e nevojshme se kurrë që jo vetëm të vazhdojnë punët e mira, të drejta e të domosdoshme që kemi nisur për republikën tonë, por që edhe të mos varemi nga Lista Serbe e as nga klubi i stëvjetruar politik”, deklaroi Kurti.

Kryeministri theksoi se varësia “në ta e prej tyre është në dëm të Kosovës”.

“Të varesh nga ta do të thotë dy gjëra: ose nuk ia donë të mirën Kosovës, ose je i gllabëruar prej më shumë se 20 vjet çkoordinimi të institucioneve dhe të sakatimit të vendit”, shtoi.

Sa i përket listës së kandidatëve të VV-së – të shumë kritikuar – Kurti e vlerësoi lartë, derisa theksoi se njëjta ka brenda saj një gamë të gjerë profesionesh.

“Nga 1 deri te 110 gjejmë: 17 mjekë, 12 inxhinierë e 3 të tjerë nga shkencat ekzakte, 12 juristë, 20 ekonomistë, 8 nga shkencat politike e integrimet evropiane, 12 nga shkencat e tjera sociale, 3 nga marrëdhëniet ndërkombëtare, 8 nga gjuha shqipe e ato të huaja, 5 nga gazetaria dhe komunikimi masiv, 2 nga bujqësia, 3 nga fusha ushtarake, 3 nga arti e kultura dhe 4 nga sporti”, potencoi Kurti.

Kurti ankohet në tubimin e VV-së: Na kanë sabotuar në këto 4 vite

Kryeministri i Kosovës, Albin Kurti, është ankuar në tubimin e VV-së duke thënë se janë sabotuar në këto 4 vite.

“Ndërkaq ata që na kanë sabotuar në këto 4 vite, duke përdorur secilin instrument që ende e kanë disi në duar edhe ndonjë ditë për të na goditur e dështuar tash po e shpalosin pezmin, inatin, xhelozinë, po besoni që me këto nuk ecën përpara. Ata janë prapa, ne jemi përpara dhe vazhdojmë bashkë përpara”, tha ai.

Tutje, Kurti goditi opozitën duke thënë se çdo iniciativë të tyre, opozita e ka dërguar në Kushtetuese, e këtë thotë se e kanë bërë për t’i sabotuar.

“E keni parë, keni dëgjuar qysh secilën iniciativë tonë e qoni në Kushtetuese për të na sabotuar edhe përmes Prokurorisë Speciale për të na urtësuar e shantazhuar, mirëpo e kanë gabim, dhe besoj që e kanë parë që e kanë gabim sepse ne jemi edhe të pakorruptueshem dhe të pashantazhueshëm, në cdo kohë edhe në çdo situatë”.