Spitali i Ri, Centrali me Gaz, Brezovica, Unaza e Parku – Lumiri liston disa nga projektet e premtuara
Kandidati për kryeministër nga Lidhja Demokratike e Kosovës, Lumir Abdixhiku, ka përmendur disa prej projekteve që ai synon t’i realizojë në rast të ardhjes në pushtet.
“Spitali i Ri, Centrali me Gaz, Brezovica, Unaza e Kryeqytetit e Parku Teknologjik janë disa nga projektet tona më të mëdha të prezantuara tash e një vit”, ka shkruar Abdixhiku në Facebook.
“Këto investime, rreth 2 miliardë euro, në katër vite mandat – me buxhet 16 miliardë, e vendosin Republikën tonë në stad të ri jo vetëm zhvillimor por dhe historik.
“Projektet e ‘Rrugës së Re’ e vet vizioni ynë, janë projeksione reale të një Kosove që po na pret. Alternativa e kësaj të ardhme mbetet urrejtja, mllefi e përçarja e brendshme në moçalin e madh popullist që ushqen veç vrer!”
Sipas të parit të LDK-së, ndryshimi po vjen dhe se mllefi e urrejtja do të mbeten në të shkuarën.
“Ndryshimi megjithatë po vjen”.
“Erdh me 40 mijë regjistrime nga bashkatdhetarët”.
“Erdh me 17 tubimet e mëdha të turneut të madh”.
“Do të vijë me angazhimin monumental që na pret në fushatë – e sidomos pas 9 shkurtit – kur puna e vërtetë nis menjëherë!”
“Mllefi e urrejtja i takojnë politikës së shkuar!”
“E ardhmja është e bukur!” ka përfunduar ai.
