Ky është burri që dyshohet se rrahu me shufër metalike 18-vjeçaren

Gazeta Sinjali pak më parë raportoi për një rast të dhunës në Lipjan, ku një 30-vjeçar dyshohet se ka sulmuar brutalisht me shufër metalike një 18-vjeçare. I dyshuari është arrestuar dhe i njëjti është dërguar në mbajtje.

Burimet e Gazetës Sinjali brenda Prokurorisë kanë bërë të ditur se i arrestuari është Alban Rizani.

Rizani dyshohet se rreth orës 03:30 të mëngjesit të sotëm ka shkuar në banesën e viktimës dhe e ka sulmuar atë me shufër metalike, duke i shkaktuar lëndime trupore. 18-vjeçarja ka kërkuar ndihmë mjekësore në spital, teksa para hetuesve policorë ka deklaruar se gjithçka ka ndodhur si pasojë e një mosmarrëveshjeje mes tyre.

Me urdhër të prokurorit, ndaj Rizanit kanë nisur hetimet për veprën ‘Dhunë në familje’ dhe i njëjti është ndaluar për 48 orë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.