Lumir Abdixhiku: U gjendëm përballë fuqisë drithëruese të një populli të bashkuar për ndryshim

Kandidati i LDK-së për kryeministër, Lumir Abdixhiku, tha se edhe Juniku, ndonëse qytet i vogël, i priti me madhështi.

Abdixhiku tha se një tubim të tillë, nuk kanë parë për një kohë të gjatë në Junik dhe se tash e kanë të qartë se fitorja po vjen e LDK-ja është në këmbë.

“Sonte, në Junikun e traditës dhe mikpritjes, u gjendëm përballë fuqisë drithëruese të një populli të bashkuar për ndryshim! Kjo tokë e pasur me histori dhe krenari, ku çdo bjeshkë flet për qëndresë e atdhedashuri, na tregoi se shpresa dhe vendosmëria për një Kosovë më të mirë janë të gjalla dhe të fuqishme”.

“Në Junik, aty ku guximi dhe tradita janë kulla të forta të identitetit tonë, ndjemë mobilizimin e jashtëzakonshëm që po përhapet në çdo kënd të vendit. Qytetarët e Kosovës, me përkushtimin dhe besimin e tyre, sot po i japin krah kauzës sonë të madhe të ndryshimit, dhe po ngriten për të treguar se 9 shkurti do të jetë dita e kthesës së madhe”, tha Abdixhiku, transmeton Klankosova.tv.

Më tej, Abdixhiku e falënderoi Junikun për forcën dhe përkrahjen e dhënë dhe që siç tha ai, është bërë pjesë e valës së madhe të ndryshimit.