Ekskluzive: Drejtoresha e Shtëpisë së Shëndetit Mendor dyshohet se ua mori pacientëve paratë e skemave pensionale

Drejtoria për Hetimin e Krimeve Ekonomike dhe Korrupsionit ka zhvilluar një aksion, me ç’rast janë kontrolluar tri lokacione të ndryshme në Pejë si dhe janë arrestuar dy persona, nën dyshimet për veprat penale “Keqpërdorim të detyrës zyrtare“ dhe “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”, raporton Sinjali.

Policia e Kosovës hetimet për këtë rast i kishte filluar nga muaji korrik të vitit të kaluar me autorizim të Prokurorisë Themelore Pejë, me ç’rast janë aplikuar masat e veçanta të hetimit.

Sinjali ka mësuar ekskluzivisht se dy të arrestuarit janë drejtoresha e Shtëpisë së Shëndetit Mendor në Deçan, Hanë Berishaj dhe Eni Berisha.

Dy persona të dyshuar në këtë rast, dyshohet se me qëllim të përfitimit të dobisë pasurore për vete kanë keqpërdorur kartelat bankare të disa personave të Shtëpisë së Shëndetit Mendor dhe ua kanë tërhequr mjetet e përfituara nga skema pensionale, (duke e ditur faktin se viktimat nuk kanë zotësi të veprimit).

Personat e dyshuar janë intervistuar dhe me vendim të prokurorit janë dërguar në mbajtje deri 48 orë.

Ndërkaq, gjatë kontrollit të lokacioneve janë gjetur dhe janë sekuestruar dëshmi gjashtë kartela bankare në emër të personave të tjerë, një telefon dhe dokumentacion me rëndësi për procedurat hetimore.

Gjithashtu janë gjetur dy armë zjarri, një AK-47 dhe një armë e shkurtër për të cilat pas konsultimit me prokurorin e rastit është iniciuar rast i veçantë.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.