“Autobusi kalon por s’i merr udhëtarët”, tri fshatra të Podujevës mbesin pa transport

Shoqata e Transportit Prishtinë – Podujevë ditën e djeshme pezulloi përkohësisht aktivitetin e saj për shkak, siç thanë, “shkeljeve flagrante të të drejtave elementare dhe rrezikut të falimentimit”.

Në një deklaratë zyrtare, shoqata theksoi se situata është pasojë e veprimeve të fundit të Komunës së Prishtinës, e cila ka lëshuar linja të reja transporti, duke shkelur procedurat ligjore.

Sipas shoqatës, këto veprime kanë shkaktuar dëme të mëdha ekonomike, duke rrezikuar vendet e punës për shumë persona që varen nga ky sektor.

Së fundmi, pas një mbledhje që u mbajt në Komunën e Prishtinës, u mor vendim që linja numër 13 (Besart Lines) të marrë udhëtarë në fshatin Sharban, linjë që i përfshin tri fshatra të tjera (Halabak, Terrnavë dhe Bellopojë), por që i ndalohet të marrë dhe të zbres udhëtarë në këto stacione (fshatra).

Lajmi u bë i ditur nga një njoftim i kompanisë “Besart Lines”.

Si pasojë e kësaj, është paralajmëruar edhe protestë në fshatin Lluzhan, të hënën, ku do të bllokohet rruga prej tre fshatrave, për arsye se janë tërhequr nga transporti dhe nuk e merr asnjë udhëtar në këto tre fshtra.