Baraliu: Kurti t’i rregullojë urgjentisht raportet me Grenellin ose të tërhiqet nga gara

Bleron Baraliu, analist politik e ish-përkrahës i Lëvizjes Vetëvendosje, i ka kërkuar kryeministrit Albin Kurti që të tërhiqet nga zgjedhjet parlamentare në mënyrë që Kosova të rregullojë raportet me Shtetet e Bashkuara të Amerikës.

Baraliu ka analizuar reagimin e Grenellit, i cili mbrëmë tha se bashkësia ndërkombëtare është kundër Kurtit dhe se Kurti është duke gënjyer kur thotë se raportet me SHBA janë në rregull.

Sipas analistit politik, qëndrimi i Grenellit është qëndrim i gjithë administratës dhe vetë presidentit të Shteteve të Bashkuara të Amerikës, Donald Trump.

“Kur flet një zyrtar i lartë (jo një kongresmen) si i kategorisë së Grenell, është duke folur krejt administrata dhe vet Presidenti. Të jeni të bindur për këtë. Në të kundërtën, nuk shkojnë më shumë se disa orë dhe Presidenti/Administrata ose e tërheqin qëndrimin me kujdes ose e ndëshkojnë dukshëm devijimin e zyrtarit në fjalë. Nëse nuk kemi tërheqje, nuk guxojmë të spekulojmë kaq cekët se Grenell është rast i izoluar”, thuhet në analizën e Baraliut.

Sipas matematicientit Baraliu, Kurti duhet që urgjentisht të rregullojë raportin me Grenellin dhe mënyra më e mirë për ta bërë këtë sipas tij është që të tërhiqet nga gara për kryeministër.

“Një patriot i vërtetë, siç do duhej të ishte Albini, ( e nuk jam më fare i sigurtë se sa gram patriotizmi kanë ngelur e intelektuali brenda tij nuk është tretur nën vrullin demolues të narcisoizmit të vet), duhet ose të rregulloj me urgjencë raportin me Grenell ose të thjeshtë tërhiqet nga gara për pushtet. Kjo e dyta nuk kam dilemë është e paevitueshme për secilin patriot apo njeri me dy kokrra mend; kjo e para jam i bindur është lehtësisht e arritshme – por me inteligjencë, jo fanatizëm katunaresk e satira rron-xeniane“, ka thënë mes të tjerash ai.

Për të rregulluar raportet në mënyrat tjera alternative siç është lobimi, Baraliu është shprehur i hapur për t’i dalë në ndihmë kryeministrit Kurti.

“Unë jam gati të të dëftoj si e ndihmoj sa mundem të arrisësh ‘pajtimin’ e patejkalueshëm me Grenell e Trump — unë dhe plotë shqiptarë të tjerë në Amerikë që me zemër dhe mendje duam të ruajmë dinjitetin tonë por edhe prosperitetin e kombit e vendit amë, qoftë edhe me një politikan të ngathët në krye siç të kemi ty sot“, thuhet në analizën e Baraliut.