Hashim Thaçi me probleme shëndetësore, ndërpritet seanca gjyqësore në Hagë

Ish-presidenti Hashim Thaçi ka munguar në gjykimin e sotëm në Dhomat e Specializuara të Kosovës.

Thaçi ka pasur probleme shëndetësore, dhe për këtë është pamundësuar pjesëmarrja e tij në këtë seancë.

Kjo është bërë e ditur gjatë seancës gjyqësore nga avokati i tij mbrojtës, Luka Mishetiq.

“As unë nuk kam informacion, sekretarja më njoftoi se klienti nuk ndihej mirë dhe nuk mund të merrte pjesë në seancën e sotme. Nuk jam konsultuar fare me klientin lidhur me këtë. Mendova se ishte zgjidhur prej jush”,deklaroi avokati.

Po ashtu në lidhje me këtë çështje u deklarua edhe gjyqtari i rastit, ku tha se Thaçi pati nevojë të konsultohet me një mjek.

“I vetmi komunikim ishte se nuk ka qenë mirë nga shëndeti dhe duhet të fliste me një mjek. Komunikoni me të nëse jep leje që të vazhdojmë pa praninë e tij” tha gjyqtari Smith,.

Seanca është duke vazhduar siç ishte paraparë ndërsa avokati tregoi se Thaçi ka dhënë leje për ta vazhduar seancën.

“Më thanë se Thaçi dhe mjeku kanë nënshkruar dokumentin për ta vazhduar gjykimin”, tha Mishetiq.

Pas këtyre zhvillimeve gjyqtari ka urdhëruar që seanca të shkojë në seancë private dhe nuk dihet çfarë është diskutuar.

Ndryshe sot është bërë e ditur se Specialja ua ka vazhduar masën e paraburgimit ish-presidentit Thaçi dhe ish-kryeparlamentarit Kadri Veseli.

Gjyqtari ka konstatuar se nuk kanë pushuar arsyet për ndërprerjen e kësaj mase.

Arsyetimet mbeten të njëjta: ndikim në dëshmitarë dhe prova.