Pas 17 vjetësh, gazetari i njohur largohet nga Klan Kosova

Gazetari nga Suhareka, Kushtrim Reshitaj, ka njoftuar se pas 17 vitesh i ka dhënë fund angazhimit të tij në televizionin Klan Kosova.

Në një postim publik, Reshitaj ka bërë të ditur se vendimi për t’u larguar nga ky medium vjen pas një periudhe të gjatë pune dhe përkushtimi, që sipas tij përfshin një nga kapitujt më të rëndësishëm të jetës së tij profesionale.

Ai kujton se në janar të vitit 2009 iu bashkua ekipit të Klan Kosovës si një i ri plot energji dhe ambicie, duke qenë pjesë e ekipit që kontribuoi në ngritjen dhe zhvillimin e këtij televizioni.

“Sot po largohem si një burrë, i përmbushur në atë që e kisha obligim të jepja nga vetja, e mbi të gjitha ballëlart e krenar për krejt këtë periudhë kaq të gjatë e të thellë në televizionin që i dha një dimension tjetër gazetarisë në Kosovë”, ka shkruar Reshitaj.

Ai ka falënderuar veçanërisht Baton Haxhiun dhe Armand Shkullakun për mundësinë dhe besimin që i dhanë në fillimet e tij në këtë medium, si dhe menaxhmentin aktual për bashkëpunimin gjatë kësaj periudhe.

Po ashtu, Reshitaj ka shprehur mirënjohje për kolegët dhe miqtë me të cilët ka punuar për vite me radhë, duke theksuar se lidhja emocionale me Klan Kosovën do të mbetet gjithmonë.

Në fund të mesazhit të tij, gazetari nga Suhareka ka lënë të kuptohet se nuk do të qëndrojë gjatë jashtë angazhimeve profesionale.

“Shikuesve u premtoj se s’do të rri gjatë ‘pasiv’”, ka shkruar ai.