Dekorohet Prishtina për muajin e Ramazanit

Sonte do të bëhet ndezja e dritave festive në Prishtinë për muajin e Ramazanit.

Më poshtë postimi i kryetarit Rama:

Të dashur qytetarë,

Me rastin e fillimit të muajit të shenjtë të Ramazanit , sonte në orën 18:45 do të bëhet ndezja e dritave nga Xhamia e Gurit deri tek Gjimnazi “Sami Frashëri”.

Me këtë rast, të pranishëm do të jetë edhe kryetari i Bashkësisë Islame, Myftiu Naim Tërnava me bashkëpunëtorë, kolegët dhe drejtorë e komunës së Prishtinës.

Ky, padyshim, është një moment i veçantë, në një muaj po ashtu të veçantë – muajin e sakrificës dhe përkushtimit, muajin e solidaritetit dhe mëshirës.

Le të na shërbejë ky muaj si një mundësi më shumë për mirëkuptim më të madh me njëri-tjetrin, dhe të jemi më solidarë, që secila shtëpi, secila familje dhe secila sofër të jetë e mbushur me të mirat që na i ka dhuruar Zoti.

Duke ju ftuar secilin prej jush që të jeni pjesë e ndezjes së dritave nga Xhamia e Gurit deri tek Gjimnazi “Sami Frashëri”, ua uroj Muajin e Shenjtë të Ramazanit.

Agjërim sa më të lehtë dhe të pranuar