Përfundon numërimi i votave me postë

Në ora 16:00 është përmbyllur i gjithë procesi i numërimit të votave të ardhura përmes postës.Këtë e ka konfirmuar për RTKlive, zëdhënësi i KQZ-së Valmir Elezi.

Ndërkohë, deri të mërkurën pasdite pritet që të përmbyllet i gjithë procesi i numërimit, pra edhe i votave me kusht e atyre të personave me nevoja të veçanta.Numërimi i votave me kusht ka nisur qysh nga mëngjesi i sotëm e ky proces në 20 tavolinat numëruese sa ka QNR-ja do të vazhdojë edhe për ato të personave me nevoja të veçanta.

Ndonëse KQZ-ja, me planin e punës e kishte përcaktuar 5 marsin si datën më të largët kur mund të dilnin me rezultatet përfundimtare të zgjedhjeve, kjo nuk pritet të ndodhë, pasur parasysh vendimin e fundit të PZAP-së, e cila ka urdhëruar KQZ-në, respektivisht Qendrën e Numërimit dhe Rezultateve që 21 fletëvotime të shpallura të pavlefshme, t’i shpallin të vlefshme e t’i përfshijnë në rezultatin përfundimtar.