Të burgosurit në Burgun e Sigurisë së Lartë po rinovojnë ambientet

Në kuadër të përpjekjeve për përmirësimin e kushteve të qëndrimit, të burgosurit në Burgun e Sigurisë së Lartë janë angazhuar në renovimin e hapësirave të brendshme të institucionit.

Punimet përfshijnë dhomat e qëndrimit, banjot, korridoret dhe ambientet e përbashkëta, duke synuar krijimin e kushteve më të mira higjieno-sanitare dhe një ambienti më të përshtatshëm për jetesë.

Ky projekt po realizohet nën mbikëqyrjen e stafit teknik, duke respektuar të gjitha standardet e sigurisë. Përveç përmirësimit të kushteve, angazhimi i të burgosurve në këto punë synon të mbështesë rehabilitimin dhe risocializimin e tyre përmes aktiviteteve të dobishme dhe produktive.

Shërbimi Korrektues i Kosovës vazhdon të punojë për krijimin e një mjedisi më të sigurt dhe më human për të burgosurit, duke përmirësuar programet rehabilituese në përputhje me standardet ndërkombëtare.