Detaje nga rasti

Të miturit shumë shpesh rezultojnë të jenë viktima të ngacmimeve e sulmeve seksuale në vendin tonë. Raste të tilla ndodhin edhe në hapësira publike, lokale, vende të ndryshme të punës, çka po ngrit shqetësim se kështu po cenohet siguria, raporton Gazeta Sinjali.

Së fundmi, dy djem të të mitur po dyshohen se janë ngacmuar seksualisht nga një burrë në Ferizaj.

Sinjali mëson se rasti ka ndodhur të premten pasdite, kur edhe u denoncua dhe Policia ndërmori veprimet e nevojshme.

Si rezultat i raportimit, i njëjti u arrestua dhe me vendim të prokurorit, pas intervestimit, u dërgua në mbajte.

Ndryshe, sipas Kodit Penal të Republikës së Kosovës, kushdo që ngacmon seksualisht personin tjetër, në veçanti personin i cili është i ndjeshëm për shkak të moshës, sëmundjes, paaftësisë, varësisë, shtatzënisë, paaftësisë së rëndë fizike apo mendore, dënohet me gjobë ose me burgim deri në tri (3) vjet.