Policia e kap në flagrancë me marihuanë një të mitur

Abuzimi me substanca narkotike nga të rinjtë mbetet një shqetësim i madh në shoqërinë kosovare. Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike, shkruan Gazeta Sinjali.

Një rast i tillë është zbuluar dje në Gjakovë, ku Policia ka ndaluar një person të moshës së mitur, nën dyshimet për posedim të narkotikëve.

Sinjali ka mësuar se pas kontrollit policor, te i dyshuari janë gjetur disa qese me substancë narkotike të llojit marihuanë.

Për pasojë, i dyshuari është shoqëruar në stacion policor për intervistim, ndërsa droga është sekuestruar.

Pas përfundimit të procedurave policore, Prokurori ka urdhëruar inicimin e rastit ndaj tij për veprën penale “blerje, posedim, shpërndarje dhe shitje të paautorizuar të narkotikëve, substancave psikotrope dhe analoge”.

Sipas Kodit Penal të Kosovës, është e jashtëligjshme që qytetarët të blejnë, posedojnë apo shpërndajnë substanca narkotike dhe mund të dënohen me gjobë apo burgim, varësisht nga sasia dhe lloji i lëndës narkotike që iu kapet nga autoritetet e rendit.