Kapet pas një muaji i dyshuari për vjedhjen e traktorit të 20 mijë eurove

Rastet e vjedhjeve po shënojnë një trend shqetësues në vend, duke vënë në rrezik pronën dhe sigurinë e qytetarëve. Jo rrallëherë, hajnat kanë cak veturat luksoze apo dhe mjetet bujqësore, vlera e të cilave është e madhe. Për një rast të tillë, të raportuar para një muaji në Mitrovicë, Policia ka arritur ta arrestojë të dyshuarin, raporton Gazeta Sinjali.

Personi i dyshuar arriti ta vjedhë një traktor në fshatin Tërnac të Mitrovicës, më 18 shkurt dhe u kap fiks pas një muaji.

Burimet e Sinjalit bëjnë të ditur se si rezultat i ndërmarrjes së veprimeve të nevojshme, policia ka arritur të identifikojë dhe arrestojë të dyshuarin Bajram Selmani, rreth 47-vjeçar.

Ai dyshohet se kishte vjedhur një traktor në vlerë të rreth 20 mijë eurove, që ishte i parkuar në afërsi të rrugës kryesore Skenderaj – Mitrovicë.

Pas arrestimit, i dyshuari është shoqëruar në stacion policor për intervistim.

Me urdhër të Prokurorit të Shtetit, i njëjti është ndaluar për 48 orë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.