Burrit i digjen dy vetura në oborr, nuk dihet se kush ua vuri flakën

Një qytetari në fshatin Gadime e Ulët të Lipjanit i është shkaktuar një dëm i madh. Në orët e para të mëngjesit të sotëm, oborri i tij u ndriçua nga flakët që kishin kapluar dy veturat e tij që po qëndronin të parkuara para shtëpisë, raporton Gazeta Sinjali.

Sinjali mëson se e gjithë ngjarja ka ndodhur rreth orës 04:30 të mëngjesit, kur pronari i shtëpisë ka vërejtur zjarrin e madh në oborr. Përballë kësaj situate ai ka telefonuar njësitë kompetente, të cilët kanë dalë menjëherë në vendin e ngjarjes.

Zjarrfikësit kanë arritur që ta lokalizojnë zjarrin dhe ta fikin në tërësi atë, teksa njësitë policore kanë kryer ekzaminimet e nevojshme lidhur me rastin. Si pasojë e zjarrit janë dëmtuar edhe dritaret e shtëpisë dhe sipas ankuesit, e gjithë vlera e dëmit kap vlerën e rreth 5 mijë euro.

Me urdhër të prokurorit rasti është iniciuar ‘Zjarrvënie’.