Përplasjet për vjedhje të votave, publikohet biseda e Abdixhikut me Hotin

Lumir Abdixhiku u kërkonte Avdullah Hotit dhe të tjerëve që ta kursenin nga ironitë pas shpërthimit të akuzave për manipulim votash.

Në një komunikim me deputetin Hoti në grupin e anëtarëve të Kryesisë së Lidhjes Demokratike të Kosovës në platformën Viber, kryetari i LDK-së i cilëson pavend brengat e shprehura nga grupi i Hotit.

Abdixhiku paraqitet si “shpëtimtar” i LDK-së.

I thotë Hotit se po qe se ai dhe të tjerët do të brengoseshin më shumë për mandatin e 21-të të partisë, e jo për çështje individuale të votave, “i kishim pas punët shumë më mirë”.

“Jam i interesuar që LDK të fitojë mandatin e 21-të. Këto çështjet tjera janë luks momental të cilën dhe nuk habitem që e keni. Sikur të ishim të gjithë të brengosur për këtë gjë, i kishim pas punët shumë më mirë”, shkruante Abdixhiku një një komunikim në Viber, të cilin portali Reporteri e ka publikuar të martën.

“Në fakt jam i brengosur për nënperformacën e degëve nga realizimi i votave të regjistruara në vota aktuale për partinë. I kemi pasë të raportuara 40 mijë regjistrime, e po na realizohen gjysma e tyre në vota. Për këtë do të duhet të kishim brengë! Ju lus që të na kurseni nga ironitë…”, u lutej Abdixhiku të pakënaqurve.

Të hënën, portali Reporteri publikoi një seri mesazhesh të shkëmbyera mes anëtarëve të LDK-së në një grup në Viber, të cilat nxjerrin në pah shpërthimin e pakënaqësive të brendshme për procesin elektoral.

Komunikimet dyshohet se kishin ngjarë në fillim të muajit mars kur po numëroheshin votat nga jashtë.

Në mesin e protagonistëve të mesazheve të publikuara të hënën është edhe ish-kryeministri Hoti.

Bazuar në komunikimet e publikuara, Hoti kërkonte të informohej për rrjedhën e votave me postë nga jashtë.

Ai ngriste dyshime të mëdha për manipulimin e votave.

“E çuditshme me votat e diasporës së LDK-së nga Komuna e Rahovecit!!! Nga disa kuti po rezulton se diaspora e Rahovecit po i voton kandidatët e Pejës, të Prishtinë e të disa komunave të tjera në masë të madhe jashtë shpërndarjes normale të votave!!! Ndoshta ky është vullneti i elektoratit të LDK-së në diasporë nga Komuna e Rahovecit!!! Por, të njëjtit kandidatë, në Degën e Rahovecit në Kosovë kanë marrë vota sipas një mesatareje të përgjithshme të shpërndarjes së votave në gjithë listën e LDK-së”, shkruante Hoti.

Lumir Abdixhiku, në një reagim në rrjetet sociale të hënën në mbrëmje, i quajti “sulme të paramenduara dhe në sinkron” ndaj LDK-së mesazhet e publikuara në media.

Kryetari i LDK-së tha se për këto sulme janë bashkuar kundërshtarët e rinj dhe të vjetër të partisë.