Thaçi deklarohet i pafajshëm
Ish-presidenti i Kosovës, Hashim Thaçi, ka nisur fjalimin përmbyllës para trupit gjykues në Hagë, duke deklaruar se është plotësisht i pafajshëm.
Në fillim të fjalës së tij, ai uroi qytetarët shqiptarë me rastin e përvjetorit të shpalljes së Pavarësisë së Kosovës, përpara se të adresonte akuzat ndaj tij.
“Për gati tri vjet në këtë sallë ju keni dëgjuar akuzat e prokurorisë. Ju keni dëgjuar edhe të vërtetën. Është vetëm një e vërtetë. Unë jam plotësisht i pafajshëm”, ka thënë Thaçi, transmeton “KosovaPress” që po e përcjell nga afër fjalën përfundimtare të të akuzuarve në Hagë.
Thaçi kujtoi se në fillim të vitit 1998 ishte student në Cyrih dhe, sipas tij, nuk kishte plane për marrjen e kontrollit në Kosovë.
“Në kohën e masakrave në fillim të vitit 1998 isha student në Cyrih. Unë nuk po bëja plane për ta marrë kontrollin e Kosovës. I vetmi që bënte plane morbide ishte Sllobodan Millosheviqi”, deklaroi ai.
Thaçi theksoi se vendimi për t’u kthyer në Kosovë ishte i motivuar nga dëshira për të kontribuar për lirinë e vendit.
“Duke parë masakrat në vendin tim, nuk mund të qëndroja indiferent. Vendosa të vij në Kosovë dhe të bëj atë që do të bënte secili prej jush. Për këtë jam krenar dhe nuk pendohem asnjëherë. Është ofendim për kujtimin e heronjve dhe mijëra viktimave, si dhe për përpjekjet e NATO-s me të cilët bashkëpunuam ngushtë”, ka thënë ai.
Sipas Thaçit, kundërshtari i vetëm i tij dhe i UÇK-së ishte regjimi i Millosheviqit.
“Unë nuk isha i sigurt nëse do ta shihja më familjen time, e lëre më të ushtroja kontroll. U ktheva në atdhe për të rrezikuar jetën time për liri. Kontrolli dhe pushteti ishin në duart e hekurta të Slobodan Millosheviqit”, përfundoi ai.
