Rritja e çmimit të rrymës, Murati: Qeveria nuk ka kontroll mbi çmimin e importit të energjisë

Ministri në detyrë, Hekuran Murati, ka komentuar vendimin e fundit të ZRRE-së për rritjen e tarifave të energjisë elektrike me 16.1%, duke sqaruar se Qeveria e Kosovës nuk ka kontroll mbi çmimet e importit të energjisë, ndërsa theksoi se çmimi i prodhimit të energjisë nga KEK-u nuk ka pësuar rritje.

Gjatë një konference për media, Murati u shpreh se dy faktorë kryesorë janë përgjegjës për rritjen e çmimit të energjisë: kostot operacionale të miratuara nga ZRRE dhe çmimi i importit.

Ai shtoi se ndonëse Qeveria ka mundësi të ndikojë në çmimin e prodhimit të energjisë nga KEK-u, ky çmim ka mbetur konstant në 30 euro për megavat orë, pa asnjë rritje të re.

Ministri tha se një arsye tjetër për këtë situatë është mungesa e investimeve të nevojshme në sektorin energjetik, të cilat, sipas tij, nuk janë realizuar nga qeveritë e kaluara. Ai theksoi se këto investime do të kishin mundësuar një furnizim më të qëndrueshëm dhe më të përballueshëm me energji.

Murati po ashtu theksoi se rritja e çmimit të energjisë është gjithashtu pasojë e rritjes në bursat ndërkombëtare dhe ndikimit të luftës në Ukrainë. Sipas tij, Qeveria nuk mund të ndikojë në çmimet që vijnë nga importi i energjisë elektrike, pasi ato varen nga situata globale dhe politikat e Bashkimit Evropian.

“Për shkak të luftës në Ukrainë dhe politikave të tjera ndërkombëtare, çmimi i energjisë elektrike në bursat ndërkombëtare është rritur. Ky është një faktor që ne si Qeveri nuk mund ta kontrollojmë”, theksoi ai.

Murati theksoi se Qeveria e Kosovës ka bërë gjithçka që ka qenë në mundësitë e saj për të shmangur rritjet e çmimit të energjisë dhe do të vazhdojë të kujdeset për të ruajtur qëndrueshmërinë e sektorit energjetik.